ଜଗତସିଂହପୁର ଠାକୁରପାଟଣାରେ ରାମଲୀଳା ଓ ରାବଣପୋଡ଼ି ଉତ୍ସବ
sumanta swain | 09 Nov 2026 | 6 min read | 3 views
News Prime Odisha
ଜଗତସିଂହପୁର ( ଏନ. ପି.ଓ ) : ମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀରାମଙ୍କ ଆଦର୍ଶ, ଧର୍ମର ଜୟ ଓ ଅଧର୍ମର ପରାଜୟର ବାର୍ତ୍ତା ନେଇ ଜଗତସିଂହପୁର ସ୍ଥିତ ଠାକୁରପାଟଣାଠାରେ ଉତ୍ସାହୀ ଗ୍ରାମୀଣ କଳାକାରମାନଙ୍କୁ ନେଇ ରାମଲୀଳା ଓ ରାବଣପୋଡ଼ି ଉତ୍ସବ ମହାଆଡ଼ମ୍ବରରେ ଅନୁଷ୍ଠିତ ହୋଇଯାଇଛି। ଗ୍ରାମାଞ୍ଚଳରେ ଲୁକ୍କାୟିତ ଥିବା କଳା ଓ ସାଂସ୍କୃତିକ ପ୍ରତିଭାକୁ ଲୋକଲୋଚନକୁ ଆଣିବା ସହ ନୂତନ ପିଢ଼ି ମଧ୍ୟରେ ଆମ ପରମ୍ପରା ଓ ସଂସ୍କୃତି ପ୍ରତି ଆଗ୍ରହ ସୃଷ୍ଟି କରିବା ଏହି ଉତ୍ସବର ମୁଖ୍ୟ ଉଦ୍ଦେଶ୍ୟ ଥିଲା।ଏହି କାର୍ଯ୍ୟକ୍ରମ ରେ ବିଶିଷ୍ଟ ଶିକ୍ଷାବିତ୍ ତଥା ରାଷ୍ଟ୍ରୀୟ ଶିକ୍ଷକ ସମ୍ମାନପ୍ରାପ୍ତ ସୁଭାଷ ଚନ୍ଦ୍ର ରାଉତଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ଉତ୍ସବର ମୁଖ୍ୟ ଆୟୋଜକ ତଥା ପୂର୍ବତନ ପୌରାଧ୍ୟକ୍ଷ ମଧୁସୂଦନ ସାହୁ, ମୁଖ୍ୟ ଅତିଥି ଭାବେ ସ୍ଥାନୀୟ ମେଡିକାଲର ଏଡିଏମ୍ଓ ଡାକ୍ତର ସରୋଜ କୁମାର ଜେନା, ସମ୍ମାନିତ ଅତିଥି ଭାବେ ସ୍ୱାମୀ ବିବେକାନନ୍ଦ ସ୍ମାରକ ଜୁନିଅର କଲେଜର ଅଧ୍ୟକ୍ଷ ସତ୍ୟଜିତ ସାହୁ ଏବଂ ଶୁଦ୍ଧାନନ୍ଦ ବିଦ୍ୟାଳୟର ପ୍ରିନ୍ସିପାଲ ବିଶ୍ୱଜିତ ସ୍ୱାଇଁ ଯୋଗଦେଇ ରାମଲୀଳାର ସାଂସ୍କୃତିକ ଓ ପରମ୍ପରା ସମ୍ପର୍କରେ ଆଲୋଚନା କରିଥିଲେ । ରାବଣପୋଡ଼ି ଉତ୍ସବ ମାଧ୍ୟମରେ ଅସତ୍ୟ ଉପରେ ସତ୍ୟର ବିଜୟର ବାର୍ତ୍ତା ପ୍ରଚାର କରାଯାଇଥିଲା । ତେବେ ଏହି ଉତ୍ସବ କେବଳ ବାହାରେ ରାବଣ ଦହନରେ ସୀମିତ ନ ରହି ମଣିଷ ନିଜ ମନ ଭିତରେ ଥିବା ଅହଂକାର, ଈର୍ଷା, କ୍ରୋଧ, ଲୋଭ ଓ ଘୃଣା ଭଳି ଅସତ୍ ପ୍ରବୃତ୍ତିକୁ ଦହନ କରିବାର ଆହ୍ୱାନ ଦେଇଥିଲା । ପ୍ରକୃତ ବିଜୟ ସେତେବେଳେ ହେବ, ଯେତେବେଳେ ମଣିଷ ଭିତରେ ମଣିଷପଣିଆର ବିଜୟ ହେବ—ଏହି ମହତ୍ତ୍ୱପୂର୍ଣ୍ଣ ବାର୍ତ୍ତା ସହ ଉତ୍ସବର ପରିସମାପ୍ତି ଘଟିଥିଲା ।
© 2026 News Prime Odisha | Content is protected under the Copyright Act, 1957
Comments (0)
Loading comments...

